Пайшоў з жыцця Генадзь Суднік

У ноч з 23 на 24 жніўня пайшоў з жыцця ў выніку цяжкой анкалагічнай хваробы наш калега, сябра Праўлення ГА “БАЖ” Генадзь Вітольдавіч Суднік.

Усяго некалькі дзён таму спадар Генадзь сустрэў свой 70-гадовы юбілей. Ён вельмі мужна змагаўся з нядугам і да апошняга займаўся прафесійнымі справамі.

Яшчэ ў пятніцу ён пакінуў каментар пад віншавальным матэрыялам на сайце baj.by:

“Не маючы магчымасці гэтыя 2 дні падысці да кампутара.., толькі сёння назапасіў сіл для напісання водгуку, а водгукі эмацыйныя, якімі вы ахуталі мяне гэтыя дні — яны па-просту працягнуць маё жыццё (вось убачыце!), дададуць творчых сілаў, умацуюць у святой веры ў дружбу, сяброўства, згуртаванасць на добрай справе!.. Я люблю вас усіх, каго ведаю. Я люблю вас тых, з кім мне давядзецца пазнаёміцца, каму пашчасціць дапамагчы звычайным словам, хоць цяпер трэба будзе ставіцца як да мудрага слова.. Але мы так рабіць не будзем яшчэ… Так гэтак годзікаў праз 70… А што тут — рукой падаць, ды яшчэ з такімі калегамі і сябрамі. ДЗЯКУЙ!
HS”.

Мы горка смуткуем разам са сваякамі і сябрамі спадара Генадзя. Вечная яму памяць…

Генадзь Суднік быў легендарнай асобай. На пачатку 1980-х ён ствараў Магілёўскую абласную студыю тэлебачання. Быў старшынёй абласнога камітэта па тэлебачанні і радыёвяшчанні. Падчас путчу ў Маскве выступіў з заявай, у якой асуджаў путчыстаў.

Суднік быў шчырым беларускім патрыётам. Ужо ў сталым узросце вывучыў беларускую мову і з тых часоў размаўляў выключна на ёй. Уваходзіў у праўленне Беларускай асацыяцыі журналістаў, рэдагаваў “Тыднёвік Магілёўскі”, пасля спынення яго выхаду супрацоўнічаў з шэрагам незалежных СМІ, піша euroradio.fm.

Развітанне з Геннадзем Суднікам адбудзецца ў нядзелю, 25 жніўня а 11 гадзіне, па адрасе вуліца Чалюскінцаў 62.